കല്യാണം കഴിഞ്ഞതില് പിന്നെ പഴയ പോലെ വെള്ളമടി ഒന്നും നടക്കുന്നില്ല. കല്യാണത്തിന് മുന്പ് കൂടെ താമസിച്ചിരുന്നവന്മാര്, ഓരോ തിങ്കളാഴ്ച്ചയും ഓഫീസില് വന്ന് വെള്ളമടി കഥ പറയുമ്പോള്, ഒരു നെടുവീര്പ്പോടെ കേട്ടിരിക്കും. പിന്നെ ഏക ആശ്വാസം, ഇവനും വരുമല്ലോ ഈ അവസ്ഥ എന്ന ചിന്തയാണ്.
അങ്ങിനെയാണ് അവളെ നാട്ടില് കൊണ്ട് വിട്ടൂടെന്ന ഐഡിയ കത്തിയത്. അതാകുമ്പോള് വീട്ടുക്കാര്ക്കും സന്തോഷം, അവള്ക്കും സന്തോഷം പിന്നെ എനിക്ക് ലോട്ടറിയടിച്ച സന്തോഷവും.
അവളെ നാട്ടില്ലോട്ട് വണ്ടി കേറ്റിവിട്ട് നേരെ ഓടി ബാറിലേക്ക്. കുപ്പിയും രാത്രി ഭക്ഷണവും വാങ്ങി അന്നത്തെ രാത്രി അര്മാദിച്ചു.
രാവിലെ വിശപ്പിന്റെ വിളി വന്നപോഴാണ് ഓര്ത്തത് അവളില്ല. ഈശ്വരാ!! കാലത്തേ പട്ടിണിയാണല്ലോ?
അവളുണ്ടായിരുന്നെങ്കില്.....
കുളി കഴിഞ്ഞ് വന്നപ്പോള് പതിവുപോലെ കട്ടിലില് ഡ്രസ്സ് ഇല്ല....സാധാരണ ദിവസങ്ങളില് ചുമ്മാ ഡ്രസ്സ് ധരിച്ചാല് മതിയായിരുന്നു, അവളുണ്ടായിരുന്നെങ്കില്...
ഓഫീസില് സ്വയ്പ് ചെയ്യാന് ഐഡന്റിറ്റി കാര്ഡ്തപ്പിയപ്പോള് മനസില്ലായി, അത് മറന്നു. പോക്കെറ്റില് നോക്കിയപ്പോള് പേഴ്സും ഇല്ല. ഇതൊന്നും ഞാന് ഒരിക്കലും മറന്നിട്ടില്ല, അവളുണ്ടായിരുന്നപ്പോള്......
രാത്രി ഓഫീസില് നിന്നെത്തി കുപ്പി നോക്കിയപ്പോള് ആലോചിച്ചു, അവളില്ല. ഇന്നും തിമിര്ക്കാം. നല്ലവണ്ണം മദ്യപിച്ച്, വിശപ്പിന്റെ വിളി വന്നപ്പോള്, ഒരു ഞെട്ടലോടെ ഞാനോര്ത്തു, അവളില്ല, ഫുഡും ഇല്ല. ഈശ്വരാ!!! അവളുണ്ടായിരുന്നെങ്കില്...
ഒരു ഭാര്യ എന്നത് വെറുമൊരു ആലങ്കാരികപദവിയല്ല എന്നു ഞാന് തിരിച്ചറിഞ്ഞത് അന്നായിരുന്നു.
